سويسرول اللحم المفروم بالصور

المقادير :

أولا :: العجينة ( هي عجينة البيتزا وكل واحدة ليها طريقتها ) وطريقتي

2 كوب دقيق
فنجان زيت
بيضة
نص ملعقة صغيرة ملح
ملعقة كبيرة خميرة فورية
3/4 كوب لبن فاتر
وبتعجنيهم مع بعض وبعدين تغطيها وتسيبيها تتخمر حوالي ساعة او اكتر شوية
وفي الوقت ده بتجهزي الحشو ومقاديره ... لحم مفروم حسب الكمية
بصلة مفرومة
بهارات
ملح وفلفل

الطريقة:
بتقلي البصلة في الزيت شوية وبعدين تضيفي عليها اللحم المفروم وبعدين البهارات والملح والفلفل ونص كوب ماء عشان تستوي كويس
وبعد مايجهز الحشو ويبرد وتتخمر العجينة بتفرديها بسمك نصف سم على شكل مستطيل
وبعدين تضيفي اللحم المفروم وتفرديه ع العجين وتسيبي مسافة من الطرف الاخير زي كده
وتلفيها زي السويسرول الحلو بالظبط
عملت مجموعة بحشو تاني جبن شرائح مع لانشون وجبن رومي انت ممكن تعمليها بحشو البيتزا او بالبسطرمة
وبرده بتلفيها عادي انا ماضيفتش جبن رومي كتير عشان الجبن الشرائح مالح كفاية وبعدين تقطعيها بسمك 5 سم تقريبا وترصيها في الصينية المدهونة زيت وتسيبيها تريح شوية بحيث يكون اللحمة من فوق وتحت زي كده
وتكوني مشغلة الفرن على درجة متوسطة يعني 170 مثلا وتدهني الوجه بيض وتدخليها حوالي نصف ساعة وده شكلها النهائي